Yndisleg helgi ...í sumarbústað!

Ooo hvað þetta var góð og notarleg helgi! Komum heim i gærkvöldi, úr bústað fjölskyldunnar, "Hálsakoti"í norðanverðum Hvalfirði.  Vorum búin að vera frá því á föstudagskvöldið.  Þvílík hvíld eftir annasama viku!  Ég, Helgi og Olli litli fórum þrjú, Aron vildi frekar vera heima og passa köttinn "loksins einn heima":).  Á laugardaginn skruppum við á Hlaðir þar sem var fjölskylduskemmtum SÁÁ. Gaman að koma í svona útilegustemningu.  Það kostaði ansi mikið inn, sérstaklega fyrir okkur sem nýttum okkur lítið sem ekkert aðstöðuna, rétt kíktum á svæðið, en auðvitað erum við að styrkja gott málefni svo ekki grátum við aurana.  

Fljótlega hittum við Birki og Kristínu, eðalfólk sem við kynntumst á Spáni fyrr í mánuðinum.  Þau voru þar með fjölskyldu Kristínar, okkur var boðið að líta inn í risahúsbíl..vá þetta var eins og íbúð, svefnherbergið var með flottu hjónarúmi m. náttborðum, vaskur í einu horni herbergisins ofl.   Svefnherbergið mitt er ekki einu sinni svona flott ..híhí.   Svo var baðherbergi í bílnum með sturtu, algjör lúxus.  Okkur var svo boðið í kaffi og spjall, ferlega næs.  Röltum svo um svæðið með Olla, veðrið var frábært,  18 stiga hiti og sól.  Settumst í smá brekku og horfðum á skemmtiatriði fyrir börnin, ávaxtakörfuna og fleira.   Fórum svo upp í bústað og aðeins í heita pottinn, Olli var óvanalega þreyttur og vildi svo bara fara að sofa.   Birkir, Kistín og litla sæta stelpan þeirra hún Bryndís, komu svo í heimsókn.  Bryndís sofnaði svo í fanginu á pabba sínum og var lögð inn í rúm, en við fullorðna fólkið sátum í stofunni og höfðum það huggulegt , drukkum kaffi og spjölluðum, voða gaman.   Þau fóru um ellefuleytið,  þá var Olli vaknaður og við ákváðum að grilla. Grilluðum svínakótilettur og pylsur, mmm rosalega gott.  

Á sunnudagsmorguninn vorum við í afslöppun í heita pottinum en rétt upp úr hádegi komu Rakel mágkona, dröfn dóttir hennar og Einar í heimsókn.  Á sama tíma komu Birkir , Kristín og börn.  Þannig að það var nóg að gera í kaffi ,kökum og spjalli. Rakel kom með afganga af löppum og rækjusalati, það stendur svo sannarlega alltaf fyrir sínu!  

Vorum komin heim um sexleytið á sunnudeginum, nennti ekki að elda svo "Nings" varð fyrir valinu.    Frábær helgi í frábæru umhverfi í góðum félagsskap!  

Allsnakinn maður í Öskjuhlíðinni

Jahérna! Ég veit að þetta hefur alltaf loðað við öskjuhlíðina, átti bara ekki von á því að rekast á kviknakinn mann (fyrir utan skuplu um hárið,)  í göngutúrnum mínum í dag í Öskjuhlíðinni.  Hann stóð bara þarna nokkra metra frá mér, allsber, talandi í Gsm- sima.  Ég var með fjögurra ára guttann minn með mér en mér tókst að beina honum frá þem allsbera, áður en hann sá hann.  Á bakaleiðinni gekk ég svo aftur fram á hann, maðurinn stóð upp á smá hól ( örugglega svo hann færi ekki fram hjá neinum) með "allt " lafandi og ennþá að tala í gemsann.  En kannski var Gemsinn bara skálkaskjól, því það er hálffáránlegt að standa kyrr á sama stað jafnvel tímunum saman án þess að virðast vera að gera neitt :).

Ég man vel eftir strípurunum í Öskjuhlíðinni og Miklatúni þegar ég var barn og unglingur.  Ég ólst upp í hlíðunum og við krakkarnir máttum kallast heppin ef við sáum ekki  einn strípaling þegar við fórum upp í Öskjuhlíð eða á Miklatúnið til að leika okkur.  Manni brá oft ansi mikið þegar maður í frakka birtist allt í einu fyrir framan mann og flétti frá ..það gerðu þeir á Miklatúninu, en karlarnir í Öskjuhlíðinni voru yfirleitt bara allsnaktir.

Engin furða að við Olli rákumst ekki á eina einustu kanínu í Öskjuhlíðinni i dag! :Þ

Ferðasagan.....og myndir!!! Endilega kíkið!

Nú er ég búin að setja inn FULLT af myndum frá spánarferðinni.  Þið bara verðið að kíkja..búið að taka svo langan tíma að setja þetta allt saman inn :o).  Við vorum í tvær vikur á Fuerteventura sem er lítil eyja , 100 km. frá afríku.  Tilheyrir kanaríeyjaklasanum, og er næst afríku af þeim eyjum.  Mér fannst mjög sérstakst að heyra það að ef við hefðum komið til Fuerteventura um og fyrir 1980, þá hefðum við þurft að fara með kameldýrum frá flugvellinum til Corralejo og ferðin með þeim hefði þá tekið heilan dag.   Það er ekki lengra síðan en það :).  Rútuferðin frá flugvellinum til Corralejo tók hins vegar um 45 mínútur.   Það sem er sérstakt við þessa eyju er allur sandurinn sem hefur borist í gegnum áraldirnar frá Sahara eyðimörkinni, og svo þetta endalausa rok sem aldrei varð lát á.  Það lægði ekki einu sinni á kvöldin. 

En rokið tempraði hitann, sólin var eins hátt á lofti og hægt er , beint fyrir ofan hausinn á manni, en hitinn varð aldrei neitt svakalegur vegna vindsins.  En einmitt þess vegna var sólin svo varasöm.  Marga sáum við svo sólbrunna að blöðrur þöktu meirihluta líkamans.  Við byrjuðum á sterkri vörn, ég var reyndar mest með vörn 15 en fór fljótlega niður í vörn 6 og slapp algjörlega við sólbruna.  Olli litli var með vörn 25 fyrstu daganna og hann slapp líka við bruna.  Helgi og Aron hins vegar brunnu báðir soldið illa á fótunum.

Á þessari eyju búa margir blásvartir afríkumenn. Flóttamenn frá Afríku að okkur skyldist.  Lífsbaráttan er hörð í Afríku, og margir freista þess að flýja yfir á bátum til spánar.  Og þá liggur Fuerteventura beinast við.   Þeir sem komast yfir eru heppnir og ekki er hægt að reka þá úr landi. En þeir sem nást á leiðinni yfir, þá er hægt að taka fasta og væntanlega senda til baka til heimalandsins.

Á þeim hluta eyjunnar sem við vorum " í Corralejo" er mikið af englendingum.  Enda var allt byggt á á því, breskir pöppar út um allt, breskur morgunverður..beikon, egg, ristað brauð, bakaðar baunir, HP sósa..sausage...og ég get sagt ykkur það að þetta er ekki það besta sem ég hef borðað.  Allur eða flestur matur var löðrandi í fitu eða olíu.  Það var ekki fyrr en við fórum að borða á kínverskum stöðum sem við fengum mjög góðan og ferskan mat.  Einnig var allt löðrandi í sykri, morgunbrauð með sykri, sykurhúðaðir snúðar..meira að segja sælgætið var velt upp úr sykri..svo var þvílíkt úrvalið af flögum, alls staðar voru til flögur af öllum stærðum og gerðum.  Ég reyndi til að byrja með að borða hollt..en það var ekki það auðveldasta að finna eitthvað sem kallast gæti hollt, meira að segja jógúrtið var þvílíkt sykurbætt.  Svo ég gafst fljótlega upp á því og missti mig í óhollustuna.  Því eitthvað varð ég auðvitað að borða:).  Aron elskaði fæðið..hehe.hann er líka sautján ára og honum leið eins og í paradís..en Olli litli borðaði bara alls ekki neitt. Það var sama hvað maður bauð honum, hann vildi ekkert borða.  En strax fyrsta daginn eftir að við komum heim, bað hann um hafragraut???!!!. 

Það var dýrt á Spáni..mér skilst að það sé sama hvar maður sé á spáni, allstaðar er dýrt. Það kom mér á óvart að fríhöfnin á Fuerteventura var RÁNDÝR..vörurnar voru miklu dýrari en í bænum sem við bjuggum í , og mikið dýrari en í fríhöfninni heima.   Við erum líka ákveðin í því að næst skal farið til Tyrklands eða á einhvern stað þar sem er ódýrt að borða og versla.  

Strendurnar á Fuerteventura eru glæsilegar.  Mjög hreinar og sjórinn þvílíkt hreinn og tær. Mikið rok svo öldurnar voru stórar og skemmtilegar.  Mikið um allskyns vatnasport, strákarnir ( og ekki síst Helgi) misstu sig á brettum úti í sjónum.  

Ég hinsvergar dýfði rétt tánum í sjóinn..hehe..ja ég fór alla vega ekki langt útí, rétt upp að mitti, ég nefnilega elska að liggja á sólbekk með drykk í hendi..og líða eins og prinsessu :o)

Aron var hreint yndislegur í ferðinni, hann hugsaði um Olla eins og hann  ætti hann sjálfur,  keypti handa honum dót - fyrir sinn pening, svæfði hann á kvöldin..ja dekraði þvílíkt við barnið og okkur auðvitað í leiðinni.  Hann var líka í því að kaupa óáfenga kokkteila á barnum við sundlaugina og færa okkur ... - San fransisco var vinsælastur.

Sundlaugagarðuinn var fallegur, góðar laugar, barnalaugin grunn og engar áhyggjur þurfti maður að hafa af barninu þar.  Íbúðirnar voru einfaldar en snyrtilegar.  Við vorum samt sem áður óheppin með það að fyrsta daginn rákumst við á hálfdauðann risakakkalakka í íbúðinni og annan daginn RISAkónguló..ég hef bara aldrei á ævi minni séð annað eins kvikindi.   Meira að segja Helgi sem hefur nú aldrei verið hræddur við nokkurt skordýr, átti í mestu vandræðum með að þora að leggja í hana.  Enda reyndist hún kröftug í mesta lagi!! "hrollur".  Þriðja daginn rákumst við á enn einn kakkalakkann..sprelllifandi á veggnum inni í íbúðinni.  Það var svo skrýtið að þessir kakkalakkar birtust bara allt í einu fyrir augunum á manni..þetta var engin smástærð á þeim, eflaust spruttu þeir bara út úr veggjunum eða eitthvað??

Ég var ekki alveg nógu ánægð með staðsetninguna á íbúðinni, íbúðirnar voru byggðar í hring í kringum laugina og við vorum í fjórðu röð frá sundlauginni.  Ansi langt frá lauginni og lobbíinu.  Ég gerði tilraun til að fá að skipta um íbúð en það reyndist erfitt og þá ákvað ég að sætta mig bara við þetta. 

Yndisleg ferð í alla staði, hitinn frábær..nema reyndar að mér var yfirleitt kalt á kvöldin þar sem að sólin settist en vindinn lægði ekki.  Ég er reyndar algjör kuldaskræfa, heyrði aldrei neinn annan kvarta um kulda:).   Varð að hlaupa inn í búð og kaupa mér peysu eitt kvöldið ..ójá.

Við fórum ekki í neina skipulagða ferð með ferðaskrifstofunni, hinsvegar leigðum við bíl og keyrðum aðeins um eyjuna, í gegnum fullt af litlum sætum þorpum.   Fórum líka í stærsta bæinn á eynni, sem heitir Puerto del Rosario og þar heimsóttum við nýtt moll..með öllum helstu tískubúðunum, Jack and Jones, Zara, Mango, Intersport og fl.  Við keyptum nú ekki mikið en eyddum helst of miklum tíma þarna inni því það er alltaf gaman að skoða. 

Frábær ferð en samt var rosagott að komast heim í menninguna, hreint og tært vatnið úr krananum, gott brauð, góður matur, hreint loft...ooo já heima er sko best!   Það fyndna er að ég er búin að liggja í sólbaði frá þvi að ég kom heim:), ekki átti ég von á svona góðu veðri um leið og ég kæmi heim.  Enda var ég búin að lofa að koma með sólina með mér frá spáni..

 ..og stóð við það!

 

Hæ elskurnar - komin frá Spáni :D

Ferðasagan kemur síðar...sólin skín nefnilega beint í augun á mér meðan ég sit við tölvuna, ég er með annað augað í pung og svitinn lekur niður andlitið á mér.  Og já ....ég er á íslandi..tók sólina með mér frá Spáni.  Ætla að skrifa meira síðar vegna þessara ástæðna sem ég nefndi.. 

kveðja "Esteros"  

Í sól og hita á Spáni eftir tvo daga!!

Sex þurrir dagar í Júní ..ekki nema von að allir séu kvefaðir í kringum mig, engin smá rigning sem búin er að vera síðustu daga.  En það eru ekki nema tveir dagar ...ja eiginlega einn dagur þar til ég fer  til Spánar svo ég sólarfíkillinn er tiltölulega róleg yfir þessu veðri.   Ég sveiflast upp og niður í tilhlökkuninni, í gær hlakkaði ég rosalega til en í dag líður mér eins og ég sé ekkert á leiðinni út.  Og svo er ég orðin kvefuð ( eins og allir hinir ) ...stútfull af kvefi, illt í hálsinum og höfðinu, já bara slöpp.  Stutt síðan ég var veik, skil þetta ekki .  Ég sem stunda líkamsrækt, borða hollan mat, tek vítamín..hvað er hægt að biðja um meira?

  Iss þetta lagast ,  hef ekki áhyggjur af því..verður frábært að liggja í leti í sól og hita á Spáni eftir tvo daga. 

 

"FLUGSLYSIÐ MIKLA" - nú gerist það!

Ég er að fara til Spánar eftir nokkra daga. Við fjölskyldan.  Ég er flughrædd með eindæmum og býst alltaf við að hvert flug verði mitt síðasta.  NÚNA gerist það, FLUGSLYSIÐ MIKLA! Ég er samt að reyna að hugsa ekkert um flugið, óþarfi að magna upp hræðsluna. Eða hvað? Ég hef líka áhyggjur af ýmsu öðru sem getur valdið ótímabærum dauða fjölskyldunnar.  Las frétt um daginn um móskítóflugur sem bera í sér banvæna veiru..þessar móskítóflugur eru á Indlandi..ég sé vel fyrir mér að nokkrar hafi slæðst með moskítóflugunum á Spáni og við fjölskyldan séum í bráðri lífshættu. 

Eins með fjarstýrðar eldflaugar bandaríkjamanna og Kóreu...eða var það ekki annars Kóreu..(?) ..þeim verður skotið upp á leið minni til spánar og lenda í árekstri við flugvélina MÍNA.

Og ekki orð um það meir;)

 

 

Það má ekki gleymast að þakka fyrir ..

....allt það góða.      Ég er að verða fertug á þessu ári.  Furðulegt!   Þegar ég var unglingur ætlaði ég ekki að verða gömul..því þá fannst mér fertugir vera gamlir.  Mikið vantaði upp á þroskan hjá manni þá. Því með árunum fær maður meira sjálfstraust og þar af leiðandi meiri vellíðan.  Maður skilur sjálfan sig og aðra betur.  Eirðarleysið hverfur og maður verður sáttari með sjálfan sig. Mér finnst ég ekki vera gömul heldur þvert á móti líður mér eins og unglambi ...þroskuðu unglambi.

Ég er líka heppin að vera hraust og heilbrigð, það eru ekki allir svo heppnir. Ég er heppin að eiga yndislega foreldra, yndisleg börn og yndislegan mann. 

Ég er þakklát fyrir svo margt og læt það bara flakka ..þó einhverjir muni kalla mig væmna :).

Yndislega kona

Hugsið ykkur lítið stúlkubarn.  Stúlka sem þriggja ára gömul fór í pössun til eldra fólks þegar foreldrar hennar fóru í siglingu út í heim.  Eldri hjónin heilluðust svo að barninu  og barnið að þeim og það varð úr að þau tóku það  alveg að sér.  Litla stúlkan var hvers manns hugljúfi , hreint yndislegt barn og falleg var hún líka. Gekk vel í skóla, var hlýðin , prúð og góð við bæði menn og dýr. 

Alltaf var hún til takst fyrir aðra, vildi öllum vel og hugsaði minnst um sjálfa sig.  Þegar að gamli maðurinn dó eftir erfið veikindi, þá var hún til takst fyrir gömlu konuna, launaði henni vel uppeldið og gerði allt sem hún gat fyrir hana.  Gamla konan veiktist og stúlkan sem þá var orðin kona og átti nú sitt eigið heimili og þrjú börn,  hugsaði vel um hana, mataði hana og hjúkraði,  verslaði og hugsaði um heimilið hennar. Enga átti gamla konan ættingja...en annað kom þó í ljós þegar að hún lést , þá skutu upp kollinum löngu horfnir ættingar sem þyrstu í eigur gömlu konunnar sem þó voru ekki miklar.  Uppeldisdóttirin sem syrgði gömlu konuna eins og sína eigin móður, sá um jarðaförina og erfidrykkjuna. Merkilegt var að stór rotta tók á móti fólkinu á tröppunum heima hjá umræddri konu á leið í erfidrykkjuna  og má vel segja að það hafi verið  tákn um þá erfiðu tíma sem fylgdu í kjölfarið. 

Rifrildi fjarskyldu ættingjana um málverk, skartgripi og fleiri eigur sem gamla konan hafði átt, heimili hennar var innsiglað að beiðni ættingjanna, svo engin ( uppeldisdóttirin m. a. ) sem lykla hafði að íbúð gömlu konunnar, gæti gengið þar inn, ofl. ofl.  En þetta stóð uppeldisdóttirin allt af sér...þó svo að þetta hafi tekið mjög á hana andlega og að hún missti persónulegar eigur sem henni þótti vænt um.  En þetta leið allt hjá.  Alla tíð síðan, hefur þessi kona hugsað um leiði gömlu konunnar og gamla mannsins sem ólu hana upp.  Hún og engin annar.  Peningar skipta engu þegar að kærleikur er annars vegar.  

Hún hefur lifað erfiða tíma en þessi kona hefur skapgerð sem flestir myndu öfunda hana af..hún hefur farið í gegnum lífið af bjartsýni og jákvæðni svo allt virðist leika í höndunum á henni.  Hún setur ekki fyrir sér erfiðleika heldur horfir alltaf fram á við á lausnina.  

Hún hefur líka átt yndislega tíma, reyndar má segja að hún hafi átt dásamlegt líf og má í raun segja að það sé mikið til  hennar ljúfu skapgerðareiginleikum að þakka.

Hún á góðan yndislegan mann,  heilbrigð börn , fallegt heimili og nú mun líf þessara konu og fjölskyldu hennar breytast enn til batnaðar þar sem að viss atburður sem beðið hefur verið eftir mjög lengi var að sigla í höfn.  Og mikið innilega á þessi kona allt það besta skilið ..og uni ég engum þess betur.

Þessi yndislega kona er móðir mín.  

 

Veikindi :(

Nú fór æfingakerfið mitt allt í klessu þar sem ég er eitthvað lasin.  Fékk þyngsli yfir höfuðið á föstudaginn og niður í hnakkann sem varð stífur.  Svo svimaði mig og ég svitnaði heil ósköp.   Varð að fara heim úr vinnunni því ekki gat ég unnið svona.  Hef ekki orðið veik í allan vetur svo þetta kom á óvart.  Á laugardaginn leit ég í spegil nývöknuð og brá heldur betur ....ég var stokkbólgin og rauð undir augunum...heldur betur ósjáleg!

  Líkaminn var voða slappur, gat varla haldið á Olla mínum...þannig að eitthvað er í gangi ..er mest fúl yfir því að ég get ekkert æft á meðan ég er svona :(.  Er að reyna að taka því rólega í dag svo ég geti nú mætt í vinnu á morgun.   

Helgi fór með alla strákana í sund í Hveragerði ( nema Danna auðvitað sem er held ég á Akureyri).     Þannig að ég er ein heima í dag.  Ætla að taka því rólega og hugsa um heilsuna.   Þar til næst ...  

Ester. 

Einfölduð næringafræði.

Orkuefnin skiptast í kolvetni, prótein, fitu og alkohol.  

Kolvetni:    Líta má svo á að kolvetni séu bensín vöðvana.  Einnig stjórnast starfsemi heila og taugakerfis af kolvetnum. Við verðum því orkulaus og einbeitingalaus ef við fáum ekki næg kolvetni.  Kolvetnisríkar fæðutegundir eru : kartöflur, hrísgrjón, pasta, brauð, kornmeti, grænmeti og ávextir.

Prótein:    Það er byggingarefni vöðva og efnasambanda í líkamanum. Við notum ( eigum að nota) prótein til uppbyggingar líkamans en ekki sem orkugjafa.  Próteinþörf einstaklinga í mismunandi en þeir sem stunda almenna líkamsrækt ættu að neyta um 1,2 g af próteinum á hvert kg. líkamsþyngdar.  Bestu próteinin koma úr dýraríkinu, þ.e. úr : fiski, kjöti, eggjum, (takmarka eggjarauður) og mjólkurafurðum.

Fita:    Hún er nauðsynleg líkamsstarfseminni en þó ætti að halda magninu undir 25-30% af heildarorkunni.  Fita fer beint í fitufrumurnar ef hún er ekki notuð sem orkugjafi, á meðan umbreyta þarf umfram kolvetnum og próteinum í fitu ef þau eru ekki notuð sem orkugjafi eða til uppbyggingar. Það er því mjög auðvelt að fitna af fitu þar sem hún er einnig meira en helmingi orkuríkari en prótein og kolvetni.    Forðist metta fitu (hörð fita) en það er öll dýrafita og einnig sum fita sem notuð er í matvælaiðnað, td. bakstur á kexi og kökum.     Jurtaolíur, td. Olífu, Raps, ISIO-4 og fleiri eru mun hollari fyrir hjarta og æðakerfi. Þessar jurtaolíur eru ómettaðar (fljótandi við stofuhita) og innihalda ekkert kólestról. 

Kolvetni innihalda aðeins 4 hitaeiningar per gram, meðan fita inniheldur 9. hitaeiningar per gram.

Heimild : World Class

Vonandi höfðuð þið gagn og gaman af :).