Hugleiðingar dagsins í dag.

Mér finnst stundum að það sem skiptir mestu máli í lífinu verði útundan hjá mér.  Það er svo mikill hraði í þjóðfélaginu og því verða ástvinir manns og vinir oft að mæta afgangi.  Ég sendi td. ekki jólakort í ár vegna tímaskorts.  Hins vegar fékk ég jólakort frá nokkrum kærum vinum og fjölskyldumeðlimum.  *samviskubit*. Ég hringi allt of sjaldan í fólk sem mér þykir vænt um því á kvöldin er ég örþreytt og nenni ekki að tala, vil helst liggja flöt upp í sófa eða fara upp í rúm að sofa. 

Ég sinni börnunum mínum ekki eins vel og ég vildi vegna anna.  Finnst ég eigingjörn að vera í skóla með vinnu því allur minn tími fer í það.   Olli minn er bara fjögurra ára og þarf á mömmu sinni að halda.  Mamma hans er yfirleitt  pirruð og þreytt þennan örstutta tíma á kvöldin sem hún hittir hann .  Ég vona að ég geti bætt honum þetta upp í sumar þegar að allt fer að róast.  Verst hvað tíminn líður og árin koma víst ekki aftur.  

Hálf þunglyndislegt blogg frá mér í dag.

Kær kveðja                                                                                                                                            Ester Júlía 

 

 

Konan úr eyjum og brúðkaupslag.

Var að grúska í gömlum "fælum" og fann þá þetta ljóð sem ég samdi fyrir konu í tilefni fimmtugsafmælis vinkonu hennar.  Ég þekkti afmælisbarnið á þeim tíma ekki neitt en fékk að vita nokkra punkta um konuna svo ég gæti barið eitthverju saman.  Það sem er svo sniðugt við þetta er að ég kynntist svo þessari konu nokkrum árum seinna í gegnum vin minn og hafði ekki hugmynd um að þetta væri konan sem ég samdi þetta ljóð um.  Ég og þessi kona erum góðar vinkonur í dag.  Og mikið hlógum við þegar við uppgötvuðum að ég hefði samið um hana ljóð!  

Læt kvæðið fylgja með að gamni ..þetta er ekkert stórbrotið , bara einföld  gamanvísa..

 Sjaldan verður því neitað
Að lengi verður að leitað
svo flottri konu
sem á tvo sonu
fæstir geta'na deitað.

Hún ber af öllum meyjum
og þverfótar ei fyrir peyjum
þeir gráta sig enn
í svefn þessir menn
sem þekkt'ana útí eyjum

Gull af manni hún geymir
um fataherbergi dreymir
með sinn stinna rass
á æfing'í world class
Þú aldrei henni gleymir

Hún fatafrík telst vera
og plássið vill ei séra
með Gísla fötum
fátæka við mötum
"ja eitthvað varð að gera".

Á mili gleðitára
með fiðring niðr'í nára
allir detta nú dauðir
líta út eins og sauðir
er hún segist fimmtíu ára.

Svo allir nú fara að púa
og upp á handlegginn snúa
FImmtug!!" hver fjárinn
Hvað varð um öll árin
Þú færð oss því ei til að trúa.

 

Ég setti einnig inn lag á síðuna hjá mér sem var spilað í brúðkaupinu mínu á menningarnótt 2004. Þetta lag er samið af bróður mínum og textann samdi mágkona mín (og kona hans).    Þetta er eitt af þeim fallegri lögum sem ég hef heyrt.   Í laginu hér á síðunni syngur Matti í Pöpunum lagið en í brúðkaupinu var það hinn yndislegi Páll Óskar sem söng lagið.  Á því miður ekki upptöku með honum, en þetta er líka vel sungið hjá Matta.   Lagið heitir "Leiðin til þín" og ég skora á ykkur að hlusta á það...

11. ráð til betri heilsu á nýju ári

 

Þá er að taka fram íþróttaskónna á nýju ári!  1. Ef þú ert kyrrsetumanneskja að byrja að hreyfa þig þá byrjaru rólega með því að fara út stutta göngutúra og svo eykur þú lengdina á göngutúrunum eftir því sem þolið verður betra.  Þú átt eftir að finna mun á þér mun fyrr  en þú býst við. 

2. Drekktu mikið vatn ...Tveir til tveir og hálfur líter af vatni fyrir konur hvern dag og tveir og hálfur til þrír lítrar fyrir karlmenn hvern dag.

3. Minnkaðu kaffidrykkjuna ..kaffi er vatnslosandi og eykur þörfina á ennþá meiri vatnsdrykkju. ( vökvaskortur)

4. Borðaðu sex máltíðir á dag.....þrjár stórar og þrjár litlar ( millibitar)

5. Borðaðu tvo  skammta af ávöxtum á dag,  þrjá skammta af grænmeti.. 1. skammtur er einn bolli.

6.Taktu lýsi til að fá nóg D-vítamín og drekktu tvö glös af mjólk á dag. 

7. Hafðu fjölbreyttni í hreyfingu, synda, hjóla, línuskautar/skautar, fjallganga, göngutúr, skokk,handbolti, fótbolti, spinning, tækjasalur..nóg er til :).

8. Gerðu fjölbreyttar kviðæfingar..svo þú styrkir ALLA kviðvöðvana. 

9. Prófaðu að sleppa sykri, hveiti og óhollri fitu ..auðveldara en þú heldur .

10. Fáðu nógan svefn..mjög mikilvægt fyrir líkama og sál. 

11. Settu þér markmið, en hafðu þau RAUNHÆF, mun auðveldara að standa við þau .

 GANGI ÞÉR VEL

 

Gamlárskvöld byrjaði ekki vel.

 Á gamlárskvöld buðum við  ömmu og móðursystur minni í mat.  Afi nýdáinn og Hafdís fjölskyldulaus þar sem börnin hennar eru bæði erlendis þessi áramótin og því ekki nokkur hemja að þær sætu tvær einar heima hja´ömmu, fyrst að pabbi og mamma voru í sumarbústaðnum.  Því miður byrjaði kvöldið ekki vel.  Ég var með matinn tilbúinn klukkan sjö og lít þá út um gluggann akkúrat á þeim tímapunkti þegar að amma dettur í hálkunni beint á andlitið. 

Ég hleyp út á inniskónum og sé Hafdísi stumra yfir ömmu sem situr á gangstéttinni hálfvönkuð.  Það er spungið fyrir á augabrúninni og blóð lekur niður kinnina á ömmu.  Við tókum undir sitthvoran handlegginn á henni og hjálpuðum henni að standa upp.  Vissum ekki hvort hún væri brotin og hún gat ekki sagt um það sjálf.  En hún gat staðið upp sem betur fer og við hjálpuðum henni upp tröppurnar. 

Þegar inn var komið, settist amma í sófann til að jafna sig og ég náði í hreinan þvottapoka og þreif blóðið úr andlitinu og setti svo plástur á sárið.  Amma var með skurð beint í augabrúninni, ck. 2 cm. langan.  Það hefði þurft að gera betur að þessu en amma harðneitaði að fara upp á slysó.  Hún hafði fengið högg undir rifbein og misst andan í smá stund þegar hún datt en hafði jafnað sig fljótt á því sem betur fer. 

Maturinn var góður, var með hamborgarhrygg frá Ali og einnig þennan danska sem var fluttur inn í fyrsta skipti þetta ár.   Báðir voru góðir þó mér hafi þótt Ali-hryggurinn betri.  Var svo með heimatilbúinn ís og súkkulaðifoundue og jarðaber.  Rosalega gott. Eftir matinn, var slakað á og svo horft á innlendan og erlendan annál.  Strákarnir vildu þó fara strax út í garð að skjóta upp rakettum og fengu þeir það , svaka gaman.

Amma var bara nokkuð hress, enda er amma ótrúlega hörð af sér og með duglegustu konum sem ég þekki.  Lætur ekki svona "smámuni" hafa áhrif á sig.  Held þetta hafi haft meiri áhrif á okkur hin heldur en hana. 

Klukkan tólf var skotið upp sem aldrei fyrr .. þetta var mjög skemmtilegt kvöld þrátt fyrir óhappið fyrr um kvöldið, allir ánægðir og glaðir.

 Gleðilegt nýtt ár kæra fólk , takk fyrir gamla árið! 

Tannverkur dauðans!

Ég fór til tannlæknis í dag.  Taka tvö í að reyna að drepa rótina, svo hægt sé að klára verkið og fylla upp í.  Tannsi hjakkaðist í tönninni í einn og hálfan tíma, með nálar ofan í rótargöngin . Deyfingin fór úr cirka 2-3 tímum síðar og ég ætla ekki að reyna að lýsa verknum sem ég fékk þá í tönnina. Næstum verra en að eiga barn! 

Ég var algjörlega viðþolslaus, þoldi ekki einu sinni hljóðið úr sjónvarpinu, gat ekki talað eða svarað þegar talað var við mig...aldrei lent í öðru eins!  Ég tók tvær Paratabs og tvær Ípúfen og fór svo inn í rúm þar sem ég kvaldist þar til leið yfir mig á koddanum. 

Já því ég steinsofnaði svona líka fast í tvo tíma.  Þegar ég vaknaði var ég skárri en þó ekki góð.  Og þegar líða tók á kvöldið fann ég að verkurinn var að koma aftur, gleypti sama skammt af töflum því ekki get ég hugsað það til enda ef verkurinn kemur aftur.  Og fyrir þetta borgar maður marga marga þúsundkalla og ekki er allt búið enn......ekki nema von að maður slugsi að fara til tannlæknis.

  En svo er þetta að sjálfsögðu ein hringavitleysa því ef ég hefði farið fyrr til tannsa hefði ekki þurft að drepa rótina osfr.   Svo eflaust..þegar upp er staðið, get ég engum kennt um nema sjálfri mér.  

 

Jólin '06

Þetta voru yndisleg jól. Ég er að springa eftir annan í hangikjöti og kvíði því að mæta í vinnu í fyrramálið.  Og við erum komin í hóp þeirra sem "eiga allt" svei mér þá!  Þvílíkt flottar gjafir sem við fengum.  Börnin fóru sko ekki í jólaköttinn, allir eiga nóg af fötum eftir þessi jól.  Ég er búin að vera með samviskubit í dag að gera hreint EKKERT..svo erfitt að ná sér niður eftir mikið stress fyrir jólin. Er að lesa eina jólagjöfina núna.. "Sér grefur gröf" eftir Yrsu, varð ekki fyrir vonbrigðum, skemmtilega skrifuð bók.   Vona að allir hafi það jafn gott um jólin eins og ég og séu sáttir og ánægðir.  

Kveðja, Ester.

Á þorláksmessu'06

Vorum að koma af Laugaveginum og það rættist heldur betur úr veðrinu! 
Yndislegt veður, gerist vart betra. 6-7 stiga hiti og nánast logn, á dauða mínum átti ég
von frekar en þessari stillu eftir það sem hefur gengið á undanfarið hjá veðurguðunum. 
Tók með mér myndavélina svo það voru teknar nokkrar myndir. 
Ég gat klárað að kaupa jólagjafirnar svo nú getur maður farið að anda rólega, slakað á og jafnvel búið til ís eða bakað. 

Gleðileg jól gott fólk. 
Jólakveðja
Ester

 

Jólagleði WorldClass og fl.

Um síðustu helgi var Jólagleði World Class haldin í Laugum. Ég var í skemmtiatriði sem mætti kalla "stóladans " ( ekki súludans) og kom það á óvart því enginn átti von á því. Sloppur fékk að fjúka og svo skyrta og þá var ekkert eftir nema..já sjáið bara sjálf..hehe . Mjög skemmtilegt kvöld. Svo var haldið niður í bæ, nánar tiltekið á Oliver, en ég hefði betur sleppt því og farið beint heim því það hallaði á gleðina um leið og komið var niður í bæ.  En það er stundum svo erfitt að hætta þegar gaman er.  Maður lærir sjaldnast af fyrri reynslu.  

Þessi vika er búin að vera annasöm, finnst ég varla hafa hugsað heila hugsun þessa vikuna.  Eftir vinnu hvert kvöld hef ég haldið í Kringluna eða Smáralind að kaupa jólagjafir því ég átti þær allar eftir. Og taka til heima hjá mér, smotterí á hverju kvöldi.

 Helgi og Árni sonur hans ( sem kom frá Svíþjóð á þriðjudaginn) fóru svo áðan að kaupa jólatré, en það voru bara til tveggja metra tré sem er of stórt heima hjá okkur. Svo þeir enduðu á að kaupa ljósleiðaratré í Byko með 50% afslætti.  Þetta er reyndar voðalega sætt tré , og bara virkilega fallegt að horfa á það.  Þetta er í fyrsta sinn sem ég er með gervitré á jólunum.  

Veðrið er ótrúlega leiðinlegt þessa daganna, endalaust rok alla daga, rigning, snjór..slagveður. Þetta ætlar engan enda að taka.  Fannst skelfilegt að heyra um hrossinn sem dóu í flóðinu fyrir austan..greyið dýrin örmögnuðust og náðu ekki að landi.  Sorglegt.

Bið að  heilsa ykkur þar til næst

kv. Ester

 

 

 

Er svipur ? =o)

Fyndið!  Samvkvæmt forritinu á ég að vera 98 % lík Natalíe Imbruglia. Hef nú ekki heyrt það í seinni tíð en þegar ég var með stutt hár (og hún líka)  þá var þetta oft nefnt við mig. Og dæmi nú hver fyrir sig:  

Slóðin á forritið er:  http://www.myheritage.com/.

Og þetta er útkoman :

Hehe..