Ömurleg lífsreynsla ungrar íslenskrar stúlku í Svíþjóð

17 ára gömul stúlka vill fá að vera aupair hjá góðu fólki í Svíþjóð.   Mamma hennar þekkti fólk sem býr í suður-Svíþjóð og hún lætur setja auglýsingu þar í blöðin.  Nokkrir hafa samband en henni lýst best á fjölskyldu sem býr úti á landi, skógi vaxið svæði við stórt  og fallegt stöðuvatn.  Eftir að hafa haft samband við fólkið sem virkaði indælt þá ákveður hún að slá til.  

Staðurinn og umhverfið sveik hana ekki, eitthver sá fallegasti staður sem hún hafði séð.  Húsið var lítið þriggja herbergja einbýlishús með áföstu útihúsi þar sem var lítið herbergi auk þvottaherbergis.  Þar átti hún að sofa.   Ekkert til að hrópa húrra fyrir en hún var ánægð, lítið og kosý og sér!

Hún er kynnt fyrir börnunum sem reyndust vera 2 drengir , annar 8 ára og hinn 9 ára. Hún var sett inn í starfið.    Hennar hlutverk var að vakna klukkan 06:30, koma drengjunum  á fætur, finna til föt og passa að þeir næðu skólabílnum.  Síðan átti hún að þurrka af og halda öllu hreinu og fínu, gefa hundinum að borða (svíns eða kindahjarta sem tekið var úr frysti deginum áður) baka brauð og bollur ( henni var kennt það) og ýmislegt annað þar til drengirnir kæmu úr skólanum.  Gefa drengjunum að drekka, sjá til þess að þeir lærðu, byrja að hafa til matinn.  Elda og leggja á borð.  Taka til eftir matinn, koma strákunum í bað.  Hafa til kvöldhressingu fyrir bóndann. Færa honum kvöldhressinguna inn í stofu þar sem hann sat í húsbóndastólnum.   Þá mátti hún eiga kvöldið fyrir sig. ( þarna var klukkan um 10:00) 

Launin voru ekki góð, 800 kr. sænskar á mánuði.  Frí um helgar.  

Eitt var það sem húsbóndinn á heimilinu brýndi strax fyrir henni.  Hún átti að þrífa gólfin og þurrka af í öllu húsinu en hún mátti ekki opna neinar skúffur í svefnherberginu enda átti hún ekkert að vera að hnýsast í þeirra persónulegu eigur.Þetta stakk hana , kom henni  á óvart, af hverju hefði hún átt að gera það? En þetta varð til þess að kynda undir forvitninni og hún ákvað að kíkja í skúffurnar þegar að þau væru farin í vinnu.

Það sem hún fann í skúffunum kom  henni  óþægilega á óvart.  Fyrst var að nefna kynlífsdót allskonar.  Svo voru þarna myndir af húsfrúnni , nakin  í klámfengnum stellingum.  Þarna voru líka myndir af ungum stúlkum, nöktum í svipuðum stellingum og myndirnar af frúnni. Það fór hrollur um stúlkuna, hún vildi ekki skoða þetta neitt frekar , setti dótið á sinn stað og lokaði skúffunni.

Stúlkunni fór að líða illa á heimilinu.  Hún sá að konan var undirgefin manninum sínum og hafði aldrei frumkvæði að neinu.  Maðurinn stjórnaði á þessu heimili.  Hann lokaði símanum á daginn þegar að þau hjónin voru í vinnu svo stúlkan gæti ekki hringt heim til íslands.  Hann sagði að það yrði að spara símareikninginn.  Stúlkan hugsaði - hvað ef það kviknar í ?  Það mátti bara hafa ljós í einu herbergi í einu í húsinu, spara rafmagnsreikninginn.   

  Stúlkan varð lasin og þurfti að að komast til læknis.  Kvensjúkdómalæknis.  Hún varð að tala við húsbóndann og biðja hann um að panta tíma fyrir sig.   Henni fannst þetta mjög óþægilegt því hún hafði aldrei áður farið til þesskonar læknis áður.  Húsbóndinn fékk tíma fyrir hana og sagðist keyra hana á til læknisins þegar að tímanum kæmi.   

Dagurinn rann upp og hún fór með húsbóndanum í bílinn.  Karlinn byrjaði strax að tala um kynlíf á leiðinni til læknisins.  Spurði hana hvort hún hefði stundað kynlíf og stúlkan þrælfeimin játti því - eitthvað smá sagði hún.  Hann sagðist geta kennt henni allt í rúminu.  Allt sem hún þyrfti að kunna.  Hann væri góður í því.  Stúlkunni leið hroðalega illa í bílnum á leiðinni og var þeirri stund fegnust þegar þau komu á áfangastað.   Karlinn vildi fá að koma með inn í skoðunarherbergið og halda í höndina á henni.   En því harðneitaði aumingja stúlkan.  Sem betur fer tók hann sönsum. 

Á leiðinni heim, hélt karlinn áfram að tala um kynlíf.  Spurði hvort hún hefði fengið fullnægingu og fleira í þeim dúr.  Hélt svo áfram að dásama sjálfan sig, sagðist vera frábæri elskhugi.  Stúlkunni leið með eindæmum illa undir þessu öllu, var mjög feimin og langaði mest til að gráta.  En hún hélt aftur að sér.  

Þegar karlinn var farinn í vinnuna, fann stúlkan símanúmer hjá sænskri stúlku sem hafði unnið sem aupair hjá fjölskyldunni á undan henni.  Hún ákvað að hringja í hana og spyrja hana út í fjölskylduna.   Sú sænska svaraði og eftir að stúlkan hafið kynnt sig , byrjaði hún að segja henni frá hvað drifið hefði á daga hennar eftir að hún kom á heimilið. Stúlkan brotnaði niður og hágrét, enda leið henni hræðilega, hún var hrædd og einmana og langt í burtu frá sinni fjölskyldu. Sænska stúlkan sem var mjög indæl sagði henni að hafa ekki áhyggjur - hún skyldi bara leyfa sér að gráta og klára svo söguna.  

Þegar stúlkan hafði lokið máli sínu og sagt þeirri sænsku frá öllu saman , þá sagðist sænska stúlkan vita um þessar myndir og kynlífstækin.  Hún sagði að karlinn hefði haft ótal aupair stúlkur og tekið klámmyndir af mörgum þeirra.   þar á meðal af sér.  Hún sagði að hann væri brenglaður kynferðislega og stúlkan ætti að reyna að koma sér í burtu þaðan - sem fyrst.   

Stúlkan þakkaði þeirri sænsku fyrir, var slegin en var fegin að hafa talað við hana.  Hún vissi nú að hún var ekki eina stúlkan sem hafði lent i karlinum.     Nú þurfti hún að taka á honum stóra sínum. Ekki gat hún sagt húsfrúnni frá þessu, sú var undirgefin karlinum og ekki ótrúlegt að hún tæki þátt í þessu með honum eða alla vega vissi af þessu.  

Stúlkan ákvað að tala við manninn um leið og hann kæmi heim.  Hún herti sig upp og talaði við manninn,  sagðist vilja hætta sem aupair hjá honum.  Karlinn virtist hissa , kallaði á konuna sína og bað stúlkuna um að segja þeim ástæðuna.  Stúlkan sagði titrandi að sér liði ekki vel þarna , hún vildi bara fá að hætta.  Karlinn hætti ekki, vildi fá að vita "raunverulega" ástæðu, setti upp mikinn undrunarsvip og  horfði á konuna sína og stúlkuna til skiptis.  Stúlkunni sem  leið verulega illa, þorði þó ekki með nokkru móti að segja satt frá,  sagðist bara vera einmana og með heimþrá.  

Sem betur fer hætti karlinn að spyrja hana og lét sér þetta gott heita.  Hann og konan voru þó  fruntaleg og ruddaleg  við stúlkuna þann tíma sem hún átti eftir að vera í húsinu.  Sem betur fer var það þó ekki langur tími.  Stúlkan fékk aupair stöðu annarsstaðar í Svíþjóð , fólk sem vildi endilega fá hana og var hún þeirri stund fegnust er hún komst burt frá þessum óheillarstað.  

Þið yrðuð hissa ef þið vissuð hvað aumingja stúlkan fékk að reyna á nýja staðnum en ég læt þessu hér með lokið, sú saga bíður betri tíma.   

 

 

Athugasemdir

[Jenný Anna Baldursdóttir, 13.7.2007 kl. 01:18]

Djöfuls viðbjóður.  Það fer um mig hrollur.  Takk fyrir að deila þessu.

[Solla Guðjóns, 13.7.2007 kl. 01:35]

Úff ekki segja að það hafi getað versnað

Eennn knús á þig

[Doddi - Þorsteinn G. Jónsson (IP-tala skráð) 13.7.2007 kl. 11:42]

Algjör hryllingur. Og ég tek undir með Ollasak ... vonandi versnar það ekki hjá henni!