Hvernig byssu má bjóða þér?

Þú skreppur inn í byssuverslun og verslar þér byssu eða byssur.   Þarft ekkert sérstakt leyfi , bara að bíða í tíu daga og þá færðu byssuna afhenta.  Ef þú ert heppinn, getur þú samið við viðkomandi byssukaupmann og fengið byssuna afhenta strax.  Hvernig byssu viltu?  Skammbyssu, riffil, vélbyssu kannski ?  Jafn auðvelt og að kaupa sér sælgæti.  Þú þarft bara að vera orðinn 18 ára. 

USA- Góssenland afbrotamannsins.  

 

Lög um skotvopnaeign í Virginíu ein þau vægustu í Bandaríkjunum

5 ára afmæli og skautar

Við héldum upp  á afmælið hans Olla á laugardaginn.  Mikið var litli kúturinn minn spenntur og vitandi það að afmælið væri klukkan þrjú , spurði hann á fimm mínútna fresti frá klukkan níu um morguninn, hvað klukkan væri .  Það komu ansi margir bæði krakkar úr leikskólanum og fjölskyldan.  Svaka fjör og síðasti gesturinn fór um klukkan 20:00! 

      Skautaferð

  

 

 

 

 

 

 

 

Í dag skelltum við okkur á skauta, ég, Helgi og Olli.  Þetta var í fyrsta skiptið sem við förum á skauta í Egilshöll og það var rosagaman. 

Það voru frekar fáir svo við höfðum nánast svellið út af fyrir okkur.  Heldur fannst mér þó dýrt að skreppa á skauta, það kostaði 2.400 fyrir okkur þrjú með leigu á skautum.  Ég spurði :  Er svo eitthvað skilagjald sem við fáum tilbaka?  Afgreiðslustelpan( frekar snúðug): Nei!   "Okey" sagði ég og hrökklaðist frá afgreiðsluborðinu..

En það var rosalega gaman að rifja upp gamla takta og snúninga, Olli var að fara í fyrsta skipti á skauta og var ansi  valtur á fótunum en grindin sem þið sjáið á myndinni reddaði málunum að nokkru leyti

 

 

Obbosí!

Fíkniefnahundur átti leið um afgreiðslu lögreglustöðvarinnar  þegar maður var staddur þar með hass í sokknum.  Hvað var maðurinn að gera á lögreglustöðinni með hass í sokknum?  Mér er spurn. Og afhverju  átti fíkniefnahundurinn leið þar um á sama tíma og maðurinn var staddur þar ? Tilviljun ? Ansas óheppni.

 

Áhugi fíkniefnahunds leiddi til handtöku

Söngvakeppni evrópskra sjónvarpsstöðva 2007

Inför ESC 2007

Var að horfa á fulltrúa norðurlandanna spá fyrir um gengi þeirra laga sem keppa í ár.   Mér fannst Eiríkur Hauksson ekki hafa sig eins mikið frammi eins og sl. ár, enda er hann sjálfur að keppa fyrir íslands hönd.  Hlýtur að vera skrýtið að vera að dæma hin lögin og flytja sjálfur lag í keppninni.  

Ísland fékk nánast fullt hús stiga, fimm stig nema frá stjórnanda þáttarins.   Veit ekki alveg hversu mikil heilindin voru í stigagjöfinni hjá kollegum Eiríks, enda erfitt að dæma góðan kunningja.  En ég held ég geti þó fullyrt að stigin hefðu farið aðeins öðruvísi ef eitthvað annað land hefði flutt þetta lag.  En samt, jú allir virtust hrifnir af laginu, man að Sylvía fékk ekki svona góða dóma í fyrra. ( Hún sat reyndar ekki við borðið)    Mín skoðun : Eiríkur er gífurlega góður söngvari  - rokkari af guðs náð. Sammála Siggu Beinu með það að hann heldur laginu uppi , en lagið sjálft er slakt og flatt.  Laglínan þó ágæt.  

Tekið af Ruv.is :    Fulltrúi Íslands er Eiríkur Hauksson söngvari sem tvisvar hefur sungið í keppninni og syngur í ár lag Sveins Rúnars Sigurðssonar, Valentine Lost. Fulltrúar hinna Norðurlandanna í þessum þáttum eru þau Adam Duvå Hall frá Danmörku, Per Sundnes frá Noregi, Thomas Lundin frá Finnlandi, Charlotte Perelli frá Svíþjóð, sem vann keppnina árið 1999 með laginu Take me to Your Heaven, og þáttunum stýrir Svíinn Christer Björkman.

Nafn hvolpsins er komið!

Ég þakka kærlega fyrir tillögurnar sem ég hef fengið um nafn á hvolpinn minn.  Mörg skemmtileg og flott nöfn sem komu fram.  Ég er nú loksins búin að velja nafn á hvolpinn, sem hann mun vonandi bera næstu 13 - 15 árin.   Nafnið þykir mér virðulegt, fallegt, vinalegt og sætt og hentar  bæði hvolpi og fullorðnum hundi.  Það er ekki eitt af þessum týpísku hundanöfnum, svo það er ekki mjög algengt.  Það á svo auðvitað eftir að festast við hann og verða hans.   Ég er mjög ánægð með nafnið og hinir fjölskyldumeðlimirnar eru sáttir.

Hvolpurinn minn heitir "Lúkas"

Ég er stolt móðir í dag

Hann elsku Olli minn er fimm ára .  Hugsa sér að það séu fimm ár síðan ég lá á fæðingardeildinni með hríðar.. .  Hann fæddist heilbrigður, 15 merkur, 52 cm. dökkbrúnn ( gulrótarsafadrykkja móðurinnar) með kolsvart hár. Til hamingju elsku strákurinn minn

   

Óska eftir tillögum á nafni!!

Þá er það komið á hreint!  Ég verð hamingjusamur hvolpaeigandi 24 mai. .  Brýt nú heilann í sameindir  og reyni að finna nafn á krúttið.  Ég óska hér með eftir nafna-hugmyndum,  frumlegum sem ófrumlegum.  Og koma svo kæru bloggvinir, allt sem ykkur dettur í hug!

  Hvolpurinn minn er lengst til hægri  í körfunni og er strákur.  Á myndinni til hægri er pabbi hvolpsins, svona til að gefa ykkur hugmynd um hvernig hvolpurinn gæti mögulega litið út þegar hann stækkar

 

Ekki hundafærsla!

Ég var að koma úr sumarbústað fjölskyldunnar , Hálsakoti í Hvalfirði.  Þvílík endurnæring og dásemd.  Fórum í gær eftir annasaman Laugardag, varð að kaupa afmælisgjöf fyrir Olla minn sem á afmæli 10. apríl.  Afmælið kemur sem sagt upp á þriðjudegi eftir páska og að sjálfsögðu á hann að fá afmælisgjöfina um morguninn , áður en hann fer í leikskólann.  

Hljóp búð úr búð, fann ekki það sem ég var að leita að, og þvílík mannmergð!  Eins og þetta væri síðasti opnunardagur fyrir ..ja ..sumarið? ......hehe..Ótrúlega mikið í búðunum.  .  En fann að lokum það sem ég leitaði að.   Og svo þurfti að fara í apótek, taka bensín, matvörubúð..við ætluðum aldrei að komast af stað.    Komumst þó  upp eftir um fimmleytið, létum strax renna í pottinn, kartöflurnar á grillið , og svo getið þið  ímyndað ykkur rest Rosa notó. Ótrúlegt hvað maður verður afslappaður í sumarbústað, afhverju ætli það sé ? Eins og maður sleppi í burtu öllum áhyggjum, manni líður dásamlega.  Maður bara "er".

Rjúpa sem hefur gert sig heimakomna í bústaðnum, vappaði í kringum okkur og sat okkur til samlætis á veröndinni meðan við drukkkum morgunkaffið.  Ótrúlega spök enda foreldrar mínir miklir fuglavinir og laða að sér fugla, allt frá örnum til rjúpna.  Rjúpan var feit og pattarleg.

Komum sem sagt heim áðan, skruppum til pabba og mömmu í kaffi fyrst..kaffi og bestu pönnsur í heimi....  Páskalærið í ofninum núna, ég skulda mér góðan göngutúr en vantar ORKU..enda stóra páskaeggið sem ég fékk nánast búið . PS. Uppskrift í athugasemdum í fyrri færslu.

Hvolpapabbinn Hermann

Þið fáið bara bloggfærslur um hunda frá mér þessa daganna .  Fór í dag að heimsækja pabba hvolpsins míns.  Sá býr í Reykjavík og heitir Hermann.  Innfluttur verðlaunahundur.  Og sá er æðislegur.  .Þvílíkt fallegur! Ég ætlaði ekki að geta komið mér út, hefði vel getað verið þarna allan daginn bara .

Fór út í langan göngutúr fyrripartinn, labbaði hálfa leið til mosfellsbæjar og á leiðinni hringdi vinur minn í mig sem sagðist ætla að ná i mig og keyra mig heim.  Spreyja vatni yfir mig úr úðabrúsa svo ég gæti logið því að ég væri svo sveitt eftir gönguna .  Hann kom nú reyndar ekkert..svo ég varð að klára gönguna og verða "sjálf"sveitt .  Var með fylltar beikonvafðar kjúklingabringur í matinn, er hreinlega að springa ennþá en mikið voru þær góðar!

Heimsókn til Papillonræktanda

 Fórum austur á Hvolsvöll í dag í yndislegu veðri.  Þvílík falleg fjallsýnin í glaða sólskini.   Við vorum sem sagt að fara til að skoða hunda og hvolpa.  Papillon.  Og urðum hreint ekki fyrir vonbrigðum!  Fullt af hundum , þvílíkt fallegum og skemmtilegum.  Þetta eru yndislegir hundar, svo kátir, lífsglaðir og vinalegir.  Og rosalega fallegir. .

Þeir voru með stórt gerði þar sem þeir gátu hlaupið og leikið sér og það gerðu þeir svo sannarlega.

  Ég varð strax ástfangin.  Skemmtilegt að sjá karaktereinkennin, einn var stærstur og hrikalegur töffari, ein var ofvirk og á FULLRI ferð, önnur var algjör prinsessa sem nennti ekki þessum látum, vildi bara láta klappa sér og kjassa - fá athygli.   

Svo fengum við að sjá hvolpana og mömmu þeirra.  Hvolparnir voru hreint yndislegir.  Steinsváfu enda bara þriggja vikna kríli.  Tvær stelpur og einn strákur.  Ég varð skotin í stráknum .  Skil ekki þetta með mig og karlkynið, ég er eina kvenkynsveran á móti fjórum ( með kettinum) karlkyns á mínu heimili.  . 

Mamma hvolpana er sko algjört rassgat, mjög lítil og nett, blíð og góð.  Hún er svört og hvít en pabbinn er meira brúnn.  Pabbinn býr í Reykjavík og ætlum við að heimsækja hann við tækifæri, verðum auðvitað að fá að sjá hann líka .  Þetta var virkilega skemmtileg ferð, kíktum svo  til tengdó í Hveragerði á leiðinni heim og fengum kaffi og norska lappa..

 

.slurp!!